Á grænni hillu – Ingibjörg Stefánsdóttir

Ingibjorg_low res

Partur af því að koma sér upp grænni og heilsusamlegri lífsstíl felst ekki einungis í því að vera meðvitaður um hvað maður setur í líkama sinn heldur einnig hvað maður setur á hann. Og þá hvort þau efni sem maður notar séu góð fyrir heilsuna og umhverfið. Fjöldi óæskilegra efna eins og paraben og alúmíum eru í mörgum snyrtivörum og geta haft slæm áhrif á húð, heilsu og umhverfið yfirhöfuð. Sem betur fer hefur fjölbreytnin í umhverfisvænum snyrtivörum aukist mikið síðastliðin ár. Í vorblaði Í boði náttúrunnar 2014 leituðum til þriggja kvenna sem hafa smám saman fært sig á grænu hilluna og fengum að forvitnast um hvað þær geyma í snyrtiskápnum. Hér er brot úr greininni þar sem Ingibjörg Stefánsdóttir, jógakennari, næringarráðgjafi, leik- og söngkona segir okkur frá snyrti rútínunni sinni: 

HÚÐ

Fyrir nokkrum árum var ég alveg sjúk í alls konar krem fyrir andlitið en það hefur breyst og nú nota ég bara kókosolíu, blandaða með ilmkjarnaolíum. Ég hef alltaf verið frekar löt að bera á líkamann en það sem ég nota oftast núna er einnig kókosolía. Mér finnst hún einnig frábær til að þrífa andlitið; þá ber ég hana á mig og tek síðan af með blautum þvottapoka og þannig næst allur farði vel af. Á morgnana blanda ég út í kókosolíuna „theraputic“-ilmkjarnaolíum. Mér finnst það alveg geggjað. Olíurnar eru frá Young Living og eru bestu olíur sem ég hef fundið. Þær eru alveg hreinar og öll vinnsla þeirra er vistvæn, sem mér finnst skipta miklu máli. Ég tek þá smávegis af kókosolíu, set út í hana einn dropa af rósaolíu og 2-3 dropa af lavender.  Ég nota líka Frankincense, sandalwood og myrru. Þetta eru allt frábærar olíur fyrir húðina, hlaðnar næringu. Stundum hef ég líka blandað olíunni í hrein sermi, sem mér finnst algjört dúndur.  

HÁR

Ég þvæ hárið ekkert rosalega oft, í mesta lagi einu sinni í viku. Ég nota heldur ekkert mikið af efnum í hárið því það er oftast í hnút eða tagli þessa dagana. Ég hef verið að nota sjampó frá Young Living og Burt bees en hvort tveggja þarf að panta að utan. Ég ætla reyndar að prófa önnur sem ég ætla að panta og kannski selja á vefverslun Yoga Shala. Mér finnst alltof sterk lykt af mörgum efnum sem sett eru í hárið. En ég er alltaf að leita að hinu fullkomna efni sem er gott fyrir liðað hár. 

FARÐI

Þar sem ég er með þrjú lítil börn er lítill tími til að punta sig en þegar ég geri það finnst mér rosalega gaman að gera mig fína, setja á mig varalit þegar tilefni gefst til. Það sem ég er að nota núna er mineral make up frá Youngblood, maskari frá Mac og kremaður sólarkinnalitur frá Chanel og varalitur frá Body Shop. Sem sagt vörur úr ýmsum áttum. 

ILMUR

Ég er löngu hætt að nota ilmvatn. Gat ekki hugsað mér að úða á mig ilmvatni og vera með ungbarn. Mér finnst agalegt þegar fólk baðar sig í of sterku ilmvatni; fæ alveg hausverk. Ef ég nota eitthvað eru það hreinar ilmkjarnaolíur.  Ein góð er til dæmis frá Young Living og heitir Joy. Ég nota heldur ekki svitalyktareyði.  Reyndar pantaði ég tvær gerðir frá Young Living um daginn fyrir manninn minn og mér fannst lyktin svo góð að ég hef nokkrum sinnum sett á mig líka enda alveg saklaust, eiturefnalaust og virkar. 

ANNAÐ

Ég elska að fara í andlitsbað, verð að fara að drífa mig.

NÆRING

Hef mikla trú á því að það sem maður setur ofan í sig hafi áhrif á húðina. Ég borða góða fitu eins og avókadó, góðar olíur, hreinsandi mat eins og sítrónur, engifer og andoxunarefni, til dæmis ber. Svo er að SOFA – svefn gerir kraftaverk fyrir húðina – anda djúpt, slaka á og njóta lífsins. Og að sjálfsögðu að drekka mikið vatn!

Ljósmynd: Hallur Karlsson
Umsjón: Dagný Berglind Gísladóttir

áskrift af tímaritinu

Tímarit um heilbrigðan og sjálfbæran lífsstíl Skoða nánar

Gjafaáskrift

Gefðu fallega og innihaldsríka gjöf Skoða nánar

Dagatal 2017

NÝTT Dagatal fyrir árið 2017 innblásið frá náttúrunni. Fallegt heima og á skrifstofuna skoða nánar

Tögg úr greininni
, , , ,
Skrifað af

Dagný er vefritstýra ibn.is og ritstýra tímaritsins Í boði náttúrunnar. Hún er með BA próf í Ritlist og Listfræði og MA próf í Hagnýtri ritstjórn og útgáfu. Dagný er vatnsberi, lærður jógakennari með ástríðu fyrir handverki, náttúruvernd og heilnæmum lífstíl.