Gott frá grunni: Majónes

TEXTI: Guðbjörg Gissurardóttir
LJÓSMYNDIR: Jón Árnason

Að útbúa mat frá grunni er bæði gefandi og skemmtilegt og við hjá Lifum betur – Í boði náttúrunnar viljum stuðla að aukinni þekkingu á einfaldri matargerð sem við getum öll átt við heima hjá okkur en fæstum dettur í hug að reyna. Með því að gera hlutina frá grunni vitum við nákvæmlega hvað við setjum ofan í okkur og sleppum við ýmisskonar aukaefni eins og bragð- og litarefni, svo að ekki sé minnst á rotvarnarefnin.

Majónes er frábær uppistaða í margar kaldar sósur, á brauðið og í okkar ástkæru kokteilsósu. Uppistaðan í majónesi er eggjarauður og olía og er það majónes í sínu einfaldasta formi. En gott er að bæta nokkrum bragðefnum við til að gera það enn bragðbetra.

MAJÓNES FRÁ GRUNNI

2 eggjarauður
1 bolli bragðlítil olía
1 msk. sítrónusafi eða edik
1 tsk. Dijon-sinnep

salt og pipar

Setjið eggjarauðurnar í skál sem er komið vel fyrir þannig að hún sé stöðug á borðinu.
Hrærið eggjarauðurnar saman með pískara (matvinnsluvél) ásamt sinnepinu.
Bættu olíunni út í, mjög hægt (mikilvægt) svo að majónesið skilji sig ekki, og hræra stöðugt á meðan.
Þegar blandan er orðin vel þykk er sítónusafa, ediki eða blöndu af báðu bætt út í ásamt örlitlu af salti og pipar.
Setjið í krukku og athugið að það er óhætt að geyma majónesið í allt að viku í ísskáp.

FLEIRI BRAGÐTEGUNDIR: Hægt er að bragðbæta majónesið á margvíslegan hátt, til dæmis með hvítlauk, fersku eða þurrkuðu kryddi, kavíar, kapers, lárperu og þannig mætti lengi telja. Oftast er gott að mauka viðbótina fyrst og hræra því svo saman við hreint majónesið.

Majónes var upphaflega fundið upp í New York árið 1905. Eiginkona verslunareigandans Richards Hellmann datt niður á þessa frábæru hugmynd þegar hún var að smyrja samlokur – og þannig varð fyrsta Hellmann’s majónesið til.

Ef það er afgangur af majónesinu þá má setja restina í hárið eins og næringu en það á víst að gera þurrt hár mjúkt og glansandi.