Lifðu núna

Stocksy_txp48c166e7Pl7000_Small_265698

Eftir hverju erum við alltaf að bíða? Hvernig væri að staldra við, líta í kringum sig og taka eftir því sem er að gerast núna – á þessu augnabliki?

Í yogatíma gerir þú flæði af yoga stöðum (asana) og heldur yfirleitt hverri stöðu í nokkra andardrætti áður en þú skiptir yfir í þá næstu. Flæðið er samblanda af hreyfingum og öndun og þótt þú staldrir við í einhverri stöðu þá heldur flæðið áfram með andardrættinum. Þegar þú heldur stöðu er gott að beina huganum frá því að hugsa hvenær skipta skuli um stöðu, hversu lengi þú þurfir að halda, hvaða staða komi næst eða hvað sé langt í slökun. Beindu huganum frekar að því að njóta þess sem að gerast í hverri stöðu fyrir sig, fá eins mikið út úr henni og finna leiðir til þess að fara dýpra inn í hana bæði líkamlega og andlega. Hafðu það hugfast að vanalega er hverri yoga stöðu ekki haldið nema í nokkra andardrætti og því kjörið tækifæri til þess að njóta, skynja og finna fyrir því sem að gerast.

Hægt er að tengja þessa hugsun við okkar daglega líf. Staldraðu við þar sem þú ert núna og sjáðu alla þá góðu hluti sem er að gerast í lífinu í kringum þig og fáðu eins mikið úr hverju augnabliki og þú getur. Reyndu að gera hversdagslífið skemmtilegt og ekki venja þig á að hugsa stöðugt til einhvers sem gerist seinna og gleyma því sem er að gerast núna. Að lifa lífinu í bið og með hugann við það sem er framundan kemur í veg fyrir að við njótum þess sem er að gerast núna. Auðvitað er heilbrigt að hlakka til þess sem er framundan – en hvað með að nýta og njóta líka tímans sem er núna? Hver dagur og hver klukkutími er ómetanlegt tækifæri til þess að læra eitthvað nýtt og taka með sér í vegnestið. Með því að festa sig í biðstöðu og verða ónæm(ur) gagnvart núinu er hætta á að þú missir af þeim tækifærum sem augnablikið býður upp á.

Lífið er núna og njótum þess á meðan við getum. Ekki eingöngu þegar þessir skemmtilegu tímar koma eða þegar biðin er senn á enda. Höldum stöðunni, njótum hennar og verum næmari fyrir sjálfum okkur og umhverfinu.

Sara Snædís 

Dagatal 2017

NÝTT Dagatal fyrir árið 2017 innblásið frá náttúrunni. Fallegt heima og á skrifstofuna skoða nánar

áskrift af tímaritinu

Tímarit um heilbrigðan og sjálfbæran lífsstíl Skoða nánar

Tögg úr greininni
, , , ,
Skrifað af

Sara Snædís Ólafsdóttir er með BS gráðu í viðskiptafræði með áherslu á stjórnun og forystu frá Háskóla Íslands. Hún starfar hjá Fjárvakri ásamt því að kenna jóga í Hreyfingu og Yoga Shala. Hún hefur dansað ballet og nútímadans frá unga aldri hjá Klassíska Listdansskólanum og kláraði 1 ár við dansháskólann Laban í London. Síðustu ár hefur hún einbeitt sér meira að jóga og er nýkomin frá Goa á Indlandi þar sem hún lærði jóga hjá Mark Darby, Kino MacGregor og Tim Feldmann. Fylgstu með Söru á Instagram: @sarasnaedis