Mikilvægi Savasana

Male Yoga Teacher With Female Students

Þrátt fyrir að gerðar eru margar krefjandi stöður í jógatíma, hver á eftir annarri, þá virðist Savasana (slökunarstaða) vera mörgum hverjum einna erfiðust. Hún krefst þess að iðkandinn slaki á alveg hreyfingarlaus, með lokuð augun og leyfi vöðvunum að hvílast og andardrættinum að róast.

Hvernig förum við í stöðuna?

  • Þú liggur á bakinu á dýnunni þinni

  • Gott bil er á milli fóta og tærnar detta í sitthvora áttina

  • Lyftu herðablöðunum aðeins upp og leyfðu þeim að fara í sundur þegar þú leggur þau aftur niður í dýnu

  • Hendur liggja í dýnu og lófar snúa upp

  • Reyndu að fetta bakið ekki meira en náttúrulega staðan þín er. Gott er að hugsa um að fara með rófubeinið aðeins niður eftir dýnunni

  • Lokaðu augunum og láttu þér líða vel í stöðunni

Hvernig náum við að slaka sem best á?

Í slökunarstöðunni er markmiðið að slaka á og leyfa líkama og huga að hvílast. Það getur reynst mörgum erfitt að ná því markmiði og því þarf að hafa í huga að hún þarfnast æfingar og þolinmæði eins og allar aðrar stöður í jóga.

Byrjaðu á því að taka nokkra djúpa andardrætti og hugsaðu um að losa spennu, streitu og áhyggjur dagsins úr líkamanum á hverri útöndun. Á sama tíma ertu að slaka á og tæma hugann. Í framhaldinu sleppir þú tökum á andardrættinum og einbeitir þér að því að slaka á öllum vöðvum líkamans. Gott er að byrja að slaka á tánum og fikra sig síðan hægt og rólega upp líkamann. Einbeittu þér að því að hlusta á öndunina og þá finnur þú að hugurinn þinn tæmist og slakar á. Hér skiptir máli að vera í núinu og njóta þess að leyfa líkamanum að slaka á og finna kyrrðina koma yfir hann.

Þeir iðkendur sem telja slökun vera óþarfa og ganga út rétt áður en hún byrjar eða þeir sem liggja og horfa upp í loftið og bíða óþolinmóðir eftir því að kennarinn biðji hópinn um að koma tilbaka, eru að missa af einni mikilvægustu stöðu sem við gerum í tímanum. Savasana tekur að jafnaði 5-10 mín. og því alls ekki tímafrekt að láta á hana reyna og finna hvað hún gerir okkur gott.

Ávinningur Savasana er mikill fyrir þá sem gefa sér tíma í hana. Þú munt fá aukna orku fyrir daginn, losa um streitu og áhyggjur og endurnæra bæði líkama og sál. Næst þegar þú ferð í jógatíma mæli ég með því að þú gerir Savasana eins vel og þú getur og njótir þess að finna orkuna og kyrrðina streyma yfir líkamann.

Sara Snædís 

HandPicked Reykjavik bókin

Er komin út og fæst í helstu bókabúðum skoða nánar

Dagatal 2017

NÝTT Dagatal fyrir árið 2017 innblásið frá náttúrunni. Fallegt heima og á skrifstofuna skoða nánar

safnaðu tímaritinu

Eldri blöð kosta einungis 850 kr. Skoða nánar

Tögg úr greininni
, , , ,
Skrifað af

Sara Snædís Ólafsdóttir er með BS gráðu í viðskiptafræði með áherslu á stjórnun og forystu frá Háskóla Íslands. Hún starfar hjá Fjárvakri ásamt því að kenna jóga í Hreyfingu og Yoga Shala. Hún hefur dansað ballet og nútímadans frá unga aldri hjá Klassíska Listdansskólanum og kláraði 1 ár við dansháskólann Laban í London. Síðustu ár hefur hún einbeitt sér meira að jóga og er nýkomin frá Goa á Indlandi þar sem hún lærði jóga hjá Mark Darby, Kino MacGregor og Tim Feldmann. Fylgstu með Söru á Instagram: @sarasnaedis