Stendur fyrir tólf tíma jógaþoni

sigrunjoga1

Sigrún Halla Unnarsdóttir, jógakennari og fatahönnuður, er einn skipuleggjanda opnu vikunnar í jógastöðinni Ljósheimum 28. ágúst – 2. sept nk.  Þá munu dyr Ljósheima standa opnar öllum þeim sem vilja koma í ókeypis í jógatíma og vikunni svo lokað með tólf tíma jógaþoni sunnudaginn 3. september þar sem hægt verður að kíkja í stuttan jógatíma eða slökun hvenær sem er yfir daginn. Jóga hefur verið hluti af lífsstíl Sigrúnar um árabil en henni finnst fátt skemmtilegra en að gefa það áfram. Við heyrðum í henni hljóðið og fræddumst meira um jógaferðalag hennar og jógaþonið framundan. 

Hver er þinn bakgrunnur og hvernig kom það til að þú fórst að stunda jóga?

Ég er fatahönnuður að mennt og bjó í 5 ár í Danmörku meðan að ég var í námi en flutti heim aftur 2011. Í grunninn er ég landsbyggðar stúlka sem á harðduglega foreldra, mömmu sem er ótrúleg handverkskona og pabba sem getur allt. Ég er í sambúð með tónlistarmanninum Ívari Pétri Kjartanssyni og við eigum 3 ára son sem heitir Georg Tumi Ívarsson. Ég var mjög mikið í íþróttum á mínum yngri árum og þaðan held ég að ég hafi þessa þörf fyrir að nota líkamann. Meðan að ég var úti í náminu var ég alltaf öðru hvoru í jóga. Þegar að ég flutti heim og hafði búið á klakanum í tvö ár ráfaði ég inn í jógastöðina Andartak einn daginn, alveg útúr stressuð eftir að hafa tekið ákvörðun um að segja upp vinnunni minni sem fatahönnuður og hafa ekkert annað starf í sjónmáli. Það eru ekki mörg störf fyrir fatahönnuði á Íslandi, og ég var með fimm ára menntun og þar af leiðandi námslán í takt við það sem þurfti að borga. Þar kynntist ég Kundalini jóga og þá var ekki aftur snúið.

Hvað er það sem jóga gerir helst fyrir þig?

Það heldur mér gangandi. Það er ekkert flóknara en það. Öðru hvoru missi ég iðkunina mína niður og þá kemur það alltaf í ljós að fljótlega byrja hlutirnir í kringum mig að hrynja niður eins og spilaborg. Kannski full dramatískt, haha, en það er tilfinningin sem ég fæ.

Af hverju fórstu svo að læra jógakennarann?

Daginn sem ég fór í jógastöðina Andartak, fór ég þangað til að fara beint í kennaranámið. Ég veit ekki alveg af hverju, ég fékk bara þessa tilfinningu að það væri það sem ég ætti að gera. En ég ákvað svo að prófa að stunda Kundalini jóga og sjá hvort að það væri eitthvað sem mér líkaði. Svo lá leiðin í kennaranámið tveimur árum síðar. Ég ákvað það held ég eftir fyrsta tímann sem ég fór í. Þetta var bara eitthvað fyrir mig og ég varð að læra meira.

Hvað er á döfinni hjá þér með haustinu?

Það er mjög margt á döfinni. Ég er að fara beina mikilli orku næstu misserin að nýju fatamerki sem ég var að stofna sem heitir AD. Þetta er í fyrsta sinn sem ég er að gera algjörlega mitt eigið og ég ætla að vera frekar mikill rebel með þetta merki. Ég ætla að gera nákvæmlega það sem mér sýnist. Ekki gera endilega það sem væri skynsamlegast heldur bara nákvæmlega það sem mig langar að gera hverju sinni. Ég hef fundið að það er eina leiðin til þess að halda áhuganum gangandi hjá mér. Ég er með svo blendnar tilfinningar gagnvart fataiðnaðinum í heild og neyslunni sem honum fylgir. Ég er í rauninni mjög skrítinn fatahönnuður. Ég gæti alveg lifað góðu lífi í crocs skóm og mussu. En á sama tíma finnst mér sjúklega gaman að nördast með efni, liti, framsetningu og hlusta á innsæið og nýta mér það í ákvarðanatöku. Að vera hönnuður snýst mjög mikið um að taka ákvarðanir. Innsæið er sennilega sameiginlegi flöturinn á þessum tveimur heimum mínum, fatahönnuninni og jóganu. Ég framleiði AD fatnaðinn í verksmiðjunni hjá Varma en ég er líka freelance hönnuður hjá þeim. Verksmiðjan er hérna í miðri Reykjavík, nánar tiltekið Ármúla 28. Það gerist ekki mikið meira local og fagurt.

Svo er ég að fara í gang með námskeið í Kundalini jóga fyrir tættar mæður og þreytta pabba í Ljósheimum. Að kenna þessa tíma er það skemmtilegasta sem ég geri. Ég byrjaði með námskeið fyrir tættar mæður síðasta vor og það gekk rosalega vel, svo það var ekkert annað í stöðunni en að kynna þreytta pabba næst til leiks. Kundalini jóga er svo fallegur heimur sem hægt er að taka svo margt úr og nota í foreldrahlutverkinu og lífinu. Það er það sem jógað snýst um, hversdagurinn og hvernig við getum bætt líf okkar með jóganu. Svo má ekki gleyma námskeiðinu Gæðastund þar sem ég og Sigríður Eir Zophaníasardóttir tónlistarkona úr Hljómsveitinni Evu munum vera með notalega stund fyrir börn á aldrinum 3-9 mánaða. Við verðum með lifandi tónlist, létt jóga og hugleiðslu. Þetta verður tími fyrir foreldra og börn til þess að njóta þess að vera saman hér og nú.

Nú stendur þú fyrir opinni viku og jógaþoni í lok mánaðarins í Ljósheimum, getur þú sagt okkur aðeins frá því?

Við erum með opna viku í Ljósheimum dagana 28. ágúst – 2. sept. þar sem frítt er í alla tíma samkvæmt stundaskrá. Svo endum við vikuna á sunnudeginum 3. sept. með jógaþoni! Að okkur vitandi hefur aldrei verið haldið jógaþon áður á Íslandi svo við iðum af spenningi. Systrasamlagið verður með samlokur og djúsa til sölu svo fólk getur bara komið stundað jóga allan daginn eða stokkið inn í einn eða tvo tíma. Við ætlum að vera með stanslaust jóga frá 10:00-22:00 þar sem allir tímarnir eru kenndir í stuttri útgáfu eða 30 min. hver tími. Þá gefst fólki tækifæri á að prófa sem flestar tegundir af jóga sem boði eru í Ljósheimum í vetur. Kennarar Ljósheima munu leiða tíma í Iyengar jóga, Kundalini jóga, Jóga nídra, Restorative jóga og gong næringu. Það er dásamlegur hópur af fólki sem kennir í Ljósheimum, algjörir viskubrunnar. Ég hlakka mikið til að kenna með þeim í vetur.

Hverja hvetur þú sérstaklega til þess að mæta?

Alla þá sem hefur langað til að prófa jóga en hafa ekki drifið sig afstað hingað til. Ég finn að það er mjög mikill áhugi meðal fólks á jóga, en á sama tíma kanski smá ótti við að maður þurfi að vera einhvernveginn svona eða hinseginn til þess að geta mætt í tíma. Raunin er sú að það geta allir stundað jóga. Ef þú leggur þig 100% fram þá færðu 100% árangur eins og góður vinur minn og jógakennarinn Prabhu Singh segir svo oft. Alveg sama hvar þú ert staddur/stödd líkamlega eða andlega.

Einhver hugleiðsla sem þú mælir með fyrir lesendur í lokin?

Fyrir þá sem eru að byrja að hugleiða mæli ég með Kirtan Kriya. Hana er hægt að finna á youtube og leiðbeiningar á heimasíðunni 3ho.org. Annars datt ég algjörlega úr takti núna í sumarfríinu, en mér finnst sumrin oft vera svolítið snúin. Svo ég er að byrja á hugleiðslu sem heitir Last mediation. Hana er hægt að finna í bókinni I am a woman. Hún er mjög góð þegar að manni vantar slökun og skýra hugsun eftir erfiða törn.

VIÐ ÞÖKKUM SIGRÚNI KÆRLEGA FYRIR SVÖRIN OG HLÖKKUM TIL AÐ MÆTA Í LJÓSHEIMA Í LOK MÁNAÐARINS.

MEIRA UM OPNU VIKUNA OG JÓGAÞONIÐ HÉR

Gjafaáskrift

Gefðu fallega og innihaldsríka gjöf Skoða nánar

Skrifað af

Í boði náttúrunnar er vandað tímarit sem var stofnað árið 2010. Vefur tímaritsins ibodinatturunnar.is var settur á laggirnar til þess að dreifa góðum boðskap til stærri hóps. Við viljum bæta lífsgæði fólks með því að efla tenginguna við náttúruna með fróðleik og innblæstri. Með þessari tengingu stuðlum við að meiri sjálfbærni og heilbrigði.

Taktu þátt í umræðunni