Jógastaða vikunnar
SLANGAN: Bhujangasana
STAÐAN:
Liggðu á maganum með fótleggi saman og ennið í gólfið. Leggðu lófana í gólfið undir axlirnar og olnbogana samhliða síðunum. Andaðu að og lyftu höfði, bringu og kvið frá jörðu. Lífbein er á jörðu allan tímann. Andaðu rólega og finndu hversu líkaminn er tilbúinn að sveigja sig í slönguna eins og hún sé að ná í laufblað í trénu. Gott er að lyfta kviðarvöðvunum inn og upp, en senda rófubein niður í átt að hælum. Passa að axlir sígi slakar niður frá eyrum. Gott er að hafa augun lokuð og rúlla þeim upp í punktinn milli augnbrúna. Ef staðan er óþægileg má færa hendurnar framar á gólfinu. Að virða líkamann og mörkin sín er mjög mikilvægt í jóga.
ÁHRIF:
Slangan bæði styrkir og liðkar allan hrygginn. Styrkir einnig kviðvöðva og örvar æxlunarfærin. Opnar bringu, háls og axlir. Slangan eykur blóðflæði og örvar nýrnaflæði og hjálpar því að losa um stress og þreytu. Slangan er góð fyrir asma einkenni, en ber þó ekki að gera í asma kasti. Slangan er orkugefandi jógastaða, en ber að varast á meðgöngu.
