Útgáfan Í boði náttúrunnar gefur út vandað tímarit undir nafninu Lifum betur – Í boði náttúrunnar, sem kemur út þrisvar á ári. Tímaritið var stofnað af hjónunum Guðbjörgu Gissurardóttur og Jóni Árnasyni sem höfðu það að markmiði að búa til fallegt, persónulegt og myndrænt tímarit um sjálfbæran og heilsusamlegan lífsstíl. Tímaritið hefur verið gefið út síðan árið 2010 og eru efnistökin fjölbreytt en þar má nefna: ræktun, híbýli, heilsu, hönnun, ferðalög, matargerð, umhverfismál, árstíðir, útivist og andleg málefni. Í nóvember 2016 hóf Í boði náttúrunnar útgáfu á sérblaðinu FÆÐA|FOOD sem fjallar um íslenska matarmenningu: sköpunargleði og matarhandverk. FÆÐA|FOOD er á íslensku og ensku og dreift í verslanir um allan heim. Á vefsíðunni icelandicfood.is er efni úr tímaritinu á ensku ásamt öðru efni sem tengist mat og matarmenningu Íslendinga.