Bakaður fiskur með byggottó

Fiskur er hráefni sem maður fær sjaldan leið á. Oft lítum við Íslendingar öfundaraugum til landanna handan hafsins þar sem fjölbreytni er meiri í mat. En ferskleiki fisksins sem við höfum hér er torfundinn annarsstaðar. Í raun má segja að fiskbúðirnar séu okkar matarmusteri með sínum breytileika eftir árstíðum. Annað hráefni sem við höldum mikið upp á er íslenska byggið en það fer einstaklega vel með fiskinum.

Bakaður fiskur með kryddjurtaþekju, byggottói og appelsínujógúrtsósu

(Uppskriftin er fyrir 4)

 – 1 msk. ólífuolía

 – 4 x 200 g fisksteikur, t.d. þorskur, keila eða blálanga

– 4 franskbrauðsneiðar, ristaðar

– 1 1/2 hvítlauksrif, pressað

– rifinn börkur af 1 sítrónu

– 1 tsk. sítrónusafi

– lauf af u.þ.b. 8 stilkum af ferskum kryddjurtum s.s. steinselju, dilli eða estragoni

– 1/2 tsk. Maldon-salt

Stillið ofninn á 220°C

Ristið brauðsneiðarnar í brauðrist eða ofni og rífið þær ofan í matvinnsluvél. Bætið við hvítlauksrifinu og sítrónuberkinum. Hakkið niður í grófa mylsnu. Bætið þá við kryddjurtunum, ólífuolíunni og sítrónusafanum og hakkið fínt.

Setjið fiskstykkin á bökunarplötu eða mót sem hefur verið olíuborið. Saltið og piprið fiskinn. Takið mylsnuna og þjappið henni ofan á fiskstykkin. Bakið í ofni í 10-12 mínútur.

Appelsínujógúrtsósa

– 3 msk. jógúrt eða súrmjólk

– 3 msk. sýrður rjómi

– rifinn börkur af 1 appelsínu

 Hrærið allt saman. Saltið og piprið að smekk.

 Byggottó

– 3 msk. ólífufuolía

– 175 g perlubygg

– 1 laukur, smátt saxaður

– 1 hvítlauksrif, smátt saxað

– 700 ml grænmetis- eða kjúklingasoð

– 1/2 paprika, skorin í strimla

– 4 sneiðar beikon, skorið í u.þ.b. 1 cm strimla

– salt

– pipar

Hitið pönnu og setjið ólífuolíuna á hana. Bætið bygginu saman við og hrærið stöðugt í þar til það hefur tekið á sig gullinn lit eða í 4-5 mínútur. Setjið þá laukinn út í og hrærið stöðugt áfram í 5-10 mínútur. Bætið loks hvítlauknum út í. Hellið þá soðinu saman við og látið malla svo byggið dragi í sig vökvann.

Eftir 25 mínútur, steikið paprikuna og beikonið á annarri pönnu og blandið síðan út í byggottóið. Hrærið í öðru hverju. Látið malla í 10-15 mínútur eða þar til byggið hefur dregið í sig vökvann.

Umsjón Inga Elsa Bergþórsdóttir & Gísli Egill Hrafnsson

FÆÐA/FOOD - fyrir matgæðinginn

Sérrit Í Boði náttúrunnar um mat og matarmenningu á íslensku og ensku. skoða nánar

Gjafaáskrift

Gefðu fallega og innihaldsríka gjöf Skoða nánar

Tögg úr greininni
, , ,
More from Í boði náttúrunnar