Eldhúsapótekið: Hósti

Í fyrradag hélt ég að árstíðarnar hefðu fært sig til þar sem undanfarið hefur verið vor í lofti en svo allt í einu, skyndilega kyngdi niður alveg heilum helling af snjó!  Í slíkum hitabreytingum er algengt að fólk taki til sín pestir sem taka á sig ólíkar myndir.  Í síðasta hluta eldhúsapóteksins skoðuðum við hin ýmsu heimilisráð við kvefi sem við höfum reynslu af að virki vel. En oft fylgir kvefinu sár hósti sem dvelur alltof lengi við og tekur frá manni orku svo vikum skiptir.

Hósti gefur til kynna að líkaminn sé að losa sig við slím eða annan skít í öndunarfærum. Hóstamixtúrur eru misáhrifaríkar og brjóstsykur dugar sjaldnast. Reynið frekar eftirfarandi:

RÓFA: Skerið rófu til helminga og skafið úr henni miðri þannig að góð hola myndist. Setið hunang ofaní rófuna og látið standa í 2-3 tíma. Þegar hunangið er búið að draga til sín safa úr rófunni er það tekið inn með skeið. Hægt að geyma í krukku í nokkra daga.

LAUKUR: Setja hálfan lauk inn í grisju eða sokk og tyllið honum á koddann þegar maður fer að sofa.

HUNANG: Hunang og sítrónusafi hafa góð áhrif á flestar tegundir hósta. Hrærið þessum tveimur hráefnum saman og takið með skeið nokkrum sinnum yfir daginn.

HVÍTLAUKUR: Látið smáttskorinn eða pressaðan hvítlauk liggja í hunangi yfir nótt og takið með skeið eftir þörfum. Gott er að bæta smá turmeric útí sem er mjög heilandi krydd.

EPLAEDIK: Til að losna við kláðann sem veldur oft óstjórnlegum hósta settu tvær msk. af eplaediki ásamt tveimur msk. Af hunangi út í örlítið af volgu vatn og drekktu. Gott að taka fyrir svefninn.

FJALLAGRÖS: Búið til te úr fjallagrösum og drekkið yfir daginn. Einnig er gott að gera drykk með 1 stk. apótekaralakkrís og ca. hálfum poka af fjallagrösum. Sjóðið í 1.1/2 lítra af vatni og látið malla í smástund. Hellið á flösku og þá áttu heimatilbúinn hóstasafa.

SÍTRÓNA: Vefjið sítrónubakstur um hálsinn. Kreistið sítrónu í c.a. 20 gráðu heitt vatn, dýfið efnisbút ofan í og vindið. Skellið þessu utan um hálsinn og vefjið ullartrefli yfir.

Gjafaáskrift

Gefðu fallega og innihaldsríka gjöf Skoða nánar

FÆÐA/FOOD - fyrir matgæðinginn

Sérrit Í Boði náttúrunnar um mat og matarmenningu á íslensku og ensku. skoða nánar

Tögg úr greininni
,
More from Í boði náttúrunnar