UPPSKRIFT Sólveig Eiríksdóttir MYNDIR Hildur Ársælsdóttir
Mæðgurnar Sólveig Eiríksdóttir, eða Solla eins og flestir þekkja hana, og Hildur Ársælsdóttir, eru miklir matgæðingar og vita fátt skemmtilegra en að elda saman. Þær leggja áherslu á ljúffengan og hollan mat þar sem dekrað er við bragðlaukana. Hér er ný uppskrift, taco með kjúklingabaunum og grænmeti, úr smiðju þeirra sem gaman er að útbúa. Njótið vel!
Hráefni
Kjúklingabaunir:
1 dós lífrænar kjúklingabaunir
1 msk. kókosolía til að steikja upp úr
½ tsk. reykt paprika
½ tsk. sjávarsaltflögur
2 msk. Bbq.-sósa
Grænmeti:
Olía til að steikja upp úr
2 dl blómkál í litlum bitum
1 dl fínt skorið hvítkál
1 dl gulrætur í þunnum sneiðum
1 dl þunnt skorinn rauðlaukur
1 dl maís (Við keyptum heilan,
ferskan maísstöngul og skárum af honum maískornið)
2 tsk. mexíkósk kryddblanda
sjávarsaltflögur eftir smekk
Aðferð:
Hellið vökvanum af kjúklingabaununum, skolið þær og þerrið. Hitið kókosolíu á pönnu, setjið kryddið út á ásamt Bbq.-sósunni og hrærið í.
Bætið kjúklingabaununum út á og látið malla þar til baunirnar eru orðnar heitar.
Hitið olíuna á pönnu. Steikið grænmetið og kryddið. Smakkið til og bætið við salti eftir þörfum.
Ofan á:
sýrðar gulrætur
avókadó
kirsuberjatómatar
ferskur kóriander
sýrður hafrarjómi
Sjá einnig Snöggsýrðar gulrætur
Þessi grein er úr vorblaði Lifum betur – í boði náttúrunnar 2021.
