Minnkum plastnotkun!

Vonandi hefur átakið plastlaus september ekki farið framhjá neinum, en það er átak til að vekja athygli á of mikilli plastnotkun hér á landi. Í tilefni mánaðarins ákváðum að deila með ykkur grein sem birtist í vorblaði Í boði náttúrunnar 2017 en í því var mikil umfjöllun um plast. Það er óhugnarlegt að hugsa til alls þess plasts sem ein manneskja hendir yfir ævina og stór hluti þess eru einnota plastvörur sem við leiðum ekki einu sinni hugann að þegar við hendum. Sífellt fleiri fréttir berast um rosalegt magn plasts sem skolast upp á land, finnst í maga sjávardýra og jafnvel finnast plastefni í manneskjum. Það geta ALLIR lagt sitt að mörkum við að minnka plastnotkun. Við báðum okkar frábæru lesendur að segja okkur frá sínum ráðum til þess og tókum saman 29 góð og gagnleg ráð til að minnka plastnotkun. 

29 ráð til að minnka plastnotkun

Í KRINGUM MAT OG DRYKK

  1. Skiptu plastpokum út fyrir margnota poka og notaðu þá þegar þú kaupir í matinn.
  2. Afþakkaðu óþarfa plastumbúðir utan um matvæli, t.d. þegar þú kaupir ávexti eða grænmeti í lausu.
  3. Ef þig vantar vöru sem einungis fæst í umbúðum, veldu þá frekar vöru sem er pökkuð í gler eða pappa/pappír.
  4. Drekktu vatn úr krana en ekki einnota plastflöskum. Settu vatn á margnota brúsa til að hafa við höndina.
  5. Notaðu margnota nestisbox t.d. úr áli undir nesti eða nasl.
  6. Geymdu sett af hnífapörum á góðum stað í vinnunni til að grípa í í staðinn fyrir plasthnífapör.
  7. Minnkaðu gosneyslu.
  8. Slepptu því að nota drykkjarrör úr plasti.
  9. Minnkaðu tyggjóneyslu – flest tyggjó, nú til dags, eru búin til úr gervi gúmmíi sem er í raun plast.
  10. Komdu með þitt eigið ílát þegar þú kaupir þér smoothie eða djús.
  11. Notaðu glerkrukkur frekar en plastílát undir mat. Glerið má endurvinna aftur og aftur.
  12. Endurnýttu plastpoka utan af brauði og notaðu sem nestispoka í staðinn fyrir að kaupa fleiri poka.
  13. Komdu með þín eigin ílát og fylltu á.
  14. Skerðu niður ávexti á síðasta snúning og settu í frysti. Þá sleppur þú við að kaupa frosna ávexti í pokum.
  15. Frystu mat í fernum undan mjólkurmat eða í gleri. Passa þarf að fylla fernurnar ekki alveg vegna þenslunar sem verður við frostið.
  16. Notaðu vaxpappír í stað plastfilmu yfir mat.

Hafðu í huga að margt smátt gerir eitt stórt. Mundu líka að enginn getur allt, en allir geta eitthvað.

BAÐHERBERGI

  1. Kauptu fljótandi handsápu, þvottaefni og hreinsiefni í stórum umbúðum eða fylltu á í Heilsuhúsinu.
  2. Verslaðu við íslensk snyrtivörumerki sem fylla á umbúðir eins og Sóley Organics.
  3. Notaðu sápustykki sem koma í pappírsumbúðum í stað sturtusápu.
  4. Skiptu burstum úr plasti út fyrir bursta úr viði eða bambusi. Þetta geta verið tannburstar, hárburstar, uppþvottaburstar og skóburstar.
  5. Notaðu rakvél með skiptanlegum blöðum í stað einnota.

ÞVOTTAHÚS

  1. Notaðu tréklemmur frekar en plastklemmur til að hengja upp þvott.

SVEFNHERBERGI

  1. Notaðu heldur tréherðatré en plastherðatré til að hengja upp föt.

BARNAHERBERGI

  1. Kauptu frekar leikföng úr tré en plasti.
  2. Fjárfestu í nútíma taubleyjum ef þú ert enn með barn á bleyju.

ANNAÐ

  1. Notaðu pensla úr viði frekar en úr plasti.
  2. Notaðu eldspítur í stað plastkveikjara.
  3. Geymdu frekar föt og dót í pappakössum en ruslapokum.
  4. Beindu viðskiptum þínum frekar að þeim sem nota endurvinnanlegar umbúðir í staðinn fyrir plastumbúðir.

 

Sjá einnig 8 umhverfisvæn skref

Þessi grein er úr vorblaði Lifum Betur – í boði náttúrunnar 2016.

2 athugasemdir

Skildu eftir svar

Netfang þitt verður ekki birt.