Fyrir vængjuðu vini okkar er veturinn fyrirboði erfiðra tíma, en þó einnig loforð um allsnægtir handan við hornið. Við getum gert þeim lífið örlítið léttara með því að setja fuglafóður í garðinn, en á jörðinni eiga þeir þó á hættu að rekast á ketti og aðra óvini. Þá er ráð að búa til fallegan krans úr þeim fræjum sem maður á til í eldhúsinu og skreytir jafnframt lauflaus trén.
Innihald:
250 g hafrar
400 g heimagerð fræblanda: sesamfræ, sólblómafræ, hörfræ, graskersfræ
175 g rúsínur
500 g kókosolía
2 msk. hnetusmjör
trönuber
Aðferð:
1. Fræin eru sett saman í skál og blandað saman. Þá er rúsínum bætt við.
Gott er að setja öll þurrefnin í form til að sjá hvort þetta er
nægilega mikið magn til að fylla það.
2. Kókosolían brædd í potti, en passa þarf að sjóða hana ekki.
3. Þá er potturinn tekinn af hellunni og hnetusmjörinu hrært út í brædda
olíuna.
4. Blöndunni er hellt yfir þurru hráefnin og öllu blandað vel saman.
5. Þá er blöndunni hellt í formið, blandað vel og þjappað til að fá
olíuna, sem gjarna lekur á undan ofan í formið, til að fara betur í öll
þurrefnin því hún heldur kransinum svo saman.
6. Trönuberin eru þá sett ofan á til að gefa skemmtilegan lit og leyfa
fuglunum að narta í.
7. Formið er þá sett inn í ísskáp og látið standa í 3 klst. eða þar til
olían hefur harðnað aftur.
Til að hengja kransinn upp er gott að nota vír og band úr lífrænum
efnum. Til að kransinn geti hangið í góðan tíma þarf að setja víra
þversum á kransinn og styrkja hann með bandi. Þá er bara eftir að binda
hann upp í tré og leyfa honum að iða af fuglalífi.
Ljósmyndir: Helga Einarsdóttir
Texti: Helga Einarsdóttir og Dagný Gísladóttir
Hér er hægt að gerast áskrifandi að Lifum betur – Í boði náttúrunnar
