Bravó avókadó!

Eitt best geymda leyndarmál sumarsins er án efa avókadó. Þó að við fáum gott avókadó árið um kring er sumarið uppskerutími þess og því ættum við nú að borða eins mikið af avókadói og við mögulega getum. 

Avókadó er stútfullt af próteinum, trefjum, andoxunarefnum, fitusýrum, fólínsýru og svo hefur verið sannað að það vinnur gegn hungri og heldur húðinni ungri. Þess vegna er avocadó í miklu uppáhaldi í Systrasamlaginu, sérstaklega lífræna Hass avókadóið.

Avókadó geymir gnótt af gæðavítamínum, eins og C, E og K-vítamínum, fosfór og fólínsýru en öll þessi vítamín eru okkur lífsnauðsynleg. Auk þess sem avókadó er sérlega gott fyrir barnshafandi konur vegna ríkulegs fólínsýruinnihalds. Þá er líka kalk og magnesíum í avókadói, járn og A-vítamín og engin transfita. En góður skammtur af omega 3 og 6. Þetta er ástæðan fyrir því að avókadó er í hópi næringarríkustu fæðu sem fyrirfinnst í náttúrunni.

BÓLGUEYÐANDI OFURFÆÐA
Vísindalegar rannsóknir styðja að avókadó er bólgueyðandi. Það stafar m.a. af samsetningu fitusýranna. Í raun er fitsýruinnihaldið í avókadó alveg einstakt, sérstaklega í lífræna Hass avókadóinu, sem við notum eingöngu í Systrasamlaginu. Hass avókadóið geymir á bilinu 18 til 20% einómettaðra fitusýra, sem er einstakt í náttúrunni. Á meðan aðrar tegundir innihalda gjarnan á bilinu 3 til 5% fitu. Fitusýrurnar í avókadói fara löturhægt í gegnum meltinguna og halda blóðsykrinum í jafnvægi. Það er meðal annars þess vegna sem það heldur okkur svona lengi frá hungri. Önnur ástæða þess að avókadó er jafn bólgueyðandi og raun ber vitni er að það inniheldur mikið magn karótenóíða. Það liggur innan í hýðinu svo passið að skafa vel úr því. 

GEGN ÖLDRUN HÚÐAR
Þá má líka geta þess að avókadó er eitt besta “yngingarmeðalið” sem náttúran hefur fram að færa. Vegna frábærs fitusýruinnihalds viðheldur hún raka húðarinnar innan frá sem kemur í veg fyrir hrukkumyndun. Þetta er líka rakið til kolvetnis í avókadói sem nefnist D-manno-heptulose sem styrkir húðþekjuna með því að örva kollagen í húð.

Avókadóhelmingur

NOKKRAR LEIÐIR TIL AÐ NOTA AVÓKADÓ

Vinsældir avókadó hafa verið vaxandi í heiminum og eru enn að vaxa. Á meðan margir nota það í salöt hafa aðrir notað það í drykki, kökur og búðinga og líka íspinna (sjá uppskrift fyrir neðan).

 

GUACAMOLE

Guacamole er frábær leið til að borða avókadó. Sumir setja saman avókadó, hvítlauk, salt og pipar og aðrir bæta við tómötum, paprikum, jurtum og kryddum. Við í Systrsamlaginu bjóðum reglulega upp á okkar útgáfu af guacamole sem er sett saman úr avókadói, tómötum, chili, límónu, kóríander og salti og pipar og er mjög frískandi.

SALAT OG SALATDRESSING

Það er tilvalið að bæta avókadó út í salatið eða salatdressinguna til að gera hana meira djúsí. Í boði náttúrunnar mælir með grænkálssalati með granateplum og avókadói.

ÍTALSKT BRAUÐ

Gott er að rista súrdeigsbrauð á pönnu upp úr hvítlauk og olíu og smyrja avókadói yfir. Ómótstæðilega gott með smá salti og pipar.

EFTIRRÉTTIR

Það er magnað að nota avókadó sem undirstöðu í góðan eftirrétt t.d. kökur og búðinga. Í boði náttúrunnar mælir með Piparmyntu-avókadó nammi.

ÞEYTINGUR (SMOOTHIE)

Við systur notum lífrænt Hass avókadó í margra af okkar þeytingum, sem gera þá allt í senn næringarríkari, saðsamari og rjómakenndari og bara betri. Má þar nefna okkar vinsælu Förefnagræna, Fagurgræna og súkkulaði/prótein þeytinganna.

ÍSPINNAR (UPPSKRIFT)

2 lítil lífræn Hass avókadó
1 bolli kókosmjólk
1/3 bolli hunang
1 tsk vanilla
1/3 bolli lífrænt hrákakó

Hreinsið avókadóið og fjarlægið steininn. Setjið kjötið í blandara og hrærið uns það er silkimjúkt. Setjið allt hitt út í og blandið mjög vel. Hellið í íspinnaform og frystið í 2 klukkustundir eða yfir nótt. Ætti að duga í sex íspinna.

Tvær helstu tegundirnar af avókadó eru Hass avókadó og Flórída avókadó. Hass avókadóið (það næringarríkara) er nefnt í höfuðið á Rudolph Hass sem fann lausn á því hvernig rækta mætti avókadó á býli.
Tögg úr greininni
, , ,