Gott frá grunni: Majónes

Að búa til mat frá grunni er bæði gefandi og skemmtilegt og við hjá Í boði náttúrunnar viljum stuðla að frekari þekkingu á einfaldri matargerð sem við getum öll átt við heima hjá okkur en fæstum dettur í hug að reyna. Með því að gera hlutina frá grunni vitum við nákvæmlega hvað við setjum ofan í okkur og sleppum við ýmiss konar aukefni eins og bragð- og litarefni, svo að ekki sé minnst á rotvarnarefnin.

Við völdum majónes í þetta skiptið þar sem við fjöllum einnig um hænur og fersk egg í grein í nýjasta tölublaðinu. Majónes er frábær uppistaða í margar kaldar sósur, á brauðið og í okkar ástkæru kokteilsósu. Og ef það er afgangur þá má setja restina í hárið eins og um næringu væri að ræða og á víst að gera þurrt hár mjúkt og glansandi!

Uppistaðan í majónesi er eggjarauður og olía og er það majónes í sínu einfaldasta formi. En gott er að bæta nokkrum bragðefnum við til að gera það enn bragðbetra.IMG_6764mayo

2 eggjarauður
1 bolli bragðlítil olía
1 msk. sítrónusafi eða edik
1 tsk. Dijon-sinnep
salt og pipar

Setjið eggjarauðurnar í rúnnaða skál sem er komið vel fyrir þannig að hún sé stöðug á borðinu og hrærið þær saman með pískara ásamt sinnepinu. Einnig er hægt að búa til majónesið í matvinnsluvél. Því næst er olíunni bætt út í og það er afar mikilvægt að gera það mjög hægt svo að majónesið skilji sig ekki. Einnig þarf að passa að hræra stöðugt á meðan olíunni er bætt út í. Þegar blandan er orðin vel þykk er sítónusafa, ediki eða blöndu af báðu bætt út í ásamt örlitlu af salti og pipar. Setjið í krukku og athugið að það er óhætt að geyma majónesið í allt að viku í ísskáp.

————————-

Fleiri bragðtegundir: Hægt er að bragðbæta majónesið á margvíslegan hátt, til dæmis með hvítlauk, fersku eða þurrkuðu kryddi, kavíar, kapers, lárperu og þannig mætti lengi telja. Oftast er gott að mauka viðbótina fyrst og hræra því svo saman við hreint majónesið.

Fróðleiksmoli: Majónes var upphaflega fundið upp í New York árið 1905. Eiginkona verslunareigandans Richards Hellmann datt niður á þessa tæru snilld þegar hún var að smyrja samlokur – og þannig varð fyrsta Hellmann’s majónesið til.

Mynd: Jón Árnason

Þessi grein er úr nýjasta tölublaði Í boði náttúrunnar: Vor 2014

forsíða vorblaðs 2014

FÆÐA/FOOD - fyrir matgæðinginn

Sérrit Í Boði náttúrunnar um mat og matarmenningu á íslensku og ensku. skoða nánar

Gjafaáskrift

Gefðu fallega og innihaldsríka gjöf Skoða nánar

Tögg úr greininni
,
More from Í boði náttúrunnar