Er Flothettan uppgötvun aldarinnar?

Það fór eins og við systur spáðum. Flotið með tilheyrandi íslenskum flotbúnaði breiðist hratt yfir heimsbyggðina og nú er svo komið að fólk í Bretlandi, Bandaríkjunum, Kanada, Portúgal, Frakklandi, Malasíu, Japan, Kuwait, Kýpur, Indlandi, Spáni, Noregi og Hollywood hefur fjárfest í Flothettu. Og það er fyrir utan alla þá Íslendinga sem hafa kveikt á perunni og notið þess að fljóta í sundlaugum, heitum pottum og hinum ýmsu vatnsuppsprettum landins. Þá hafa margir Íslendingar þegar ferðast með Flothettuna til Flórida, Balí, Ítalíu, Spánar og í Gömlu laugina Flúðum, sem hefur alla burði til þess að verða ein dýrmætasta uppspretta Samflots á Íslandi. Ekki síst í vetur, til að komast úr ljósmengunni í beina snertingu við Norðurljósin og kannski almættið.

Já, það er dásamlegt að fylgjast með framgangi Flothettunar. Því bara á síðasta ári vissu mjög fáir um tilvist þessar framúrskarandi íslensku hönnunar Unnar Valdísar Kristjánsdóttur vöruhönnuðar. Eins og Unnur hefur sjálf margoft upplýst í blaðaviðtölum og víðar, varð flothettan til út frá hugleiðingum hennar um breyttar áherslu í heilsueflingu, og ekki síst vegna þess að tíðarandinn hafi kallað á fleiri valmöguleika sem miði að ró, slökun og jafnvel hugleiðslu í stressuðu samfélagi. Markmið Unnar var að freista þess að bjóða upp á nýja og skemmtilega siði í baðmenningu þjóðarinnar sem á þessa miklu vatnsauðlegð. Og það er sannarlega að takast.

SAMFLOTIÐ næstum 1 árs!

Um leið og við systur sáum glitta í hugmynd Unnar urðum við hugfangnar. Hvað gat verið annað þarna á ferð en alger klassík sem heimurinn myndi smám saman uppgötva? Það hefur líklega engin orðað það betur en sú sem benti á að Flothettan hefði eins KitceAid hrærivélin fæðst sígild. Fljótlega fórum við að stunda tilraunaflot með Unni, fyrst í Sóley Natura Spa, en þegar ljóst varð að við systur myndum opna heilsuhof fyrir framan Sundlaug Seltjarnarness lá beinast við að efna til Samflots undir berum himni og leyfa fleirum að fljóta og njóta með okkur. Það kom bara ekki annað til greina en að Flothettan yrði hluti af hugmyndafræði Systrasamlagsins enda yfirlýst stefna okkar að ganga skrefinu lengra í heilsumálum og taka andann með í efnið.

Samflotið í Seltjarnarneslauginni hefur nú staðið yfir í nærri ár. Hófst með skemmtilegu sunnudagsmorgunfloti á menningarhátíð Seltjarnarness þar sem tónlist var leidd ofan í laugina. Margir mættu og upplifðu einstaka morgunstund. Í vetur vorum við systur í samvinnu við Unni ýmist með Samflot einu sinni í viku eða tvisvar. En í sumar hefur Samflotið verið mánðarlega á sunnudagsmorgnum. Næsta Samflot Systrasamlagsins er einmitt núna á sunnudag 20. júlí kl. 9.00 í Sundlaug Seltjarnarness. Þar höldum við uppteknum hætti og bjóðum alla velkomna og lánum aukahettur. En hvetjum líka þá sem eiga þegar hettur til að mæta og njóta með okkur.

Leiga á flothettum næsta skref

Það er líka gaman að segja frá því að frá og með þessari viku verður hægt að fá leigðar Flothettur og fótaflot í Systrsamlaginu, frá mánudegi til laugardags. Og svona lítur það út:

PARTUR ÚR DEGI: Leiga á opnunartíma Systrasamlagsins, allt að þrír tímar:

Frá kl. 9.00 til kl. 16.00 (skila verður Flothettu fyrir kl. 17.30): Verð 1000 kr.

DAGSLEIGA: frá kl. 9.00, skil fyrir kl. 17.30. Verð: 1500 kr

SÓLARHRINGSLEIGA: Hægt að sækja frá. 9.00 og skila fyrir 17.30 daginn eftir. Verð: 2000 kr.

HELGARLEIGA: Frá föstudegi, skila fyrir hádegi á mánudegi. Verð: 2500 kr.

Flothettan og fótaflotið fæst í Systrasamlaginu og kosta 17.900 kr.

Flaut Snorri Sturluson?

En það er nú ekki svo að mannkynssagan sé ekki uppfull af sögum af allskyns floti og tilraunum mannsins til að fljóta. Alveg erum við vissar um að Snorri Sturluson hefði tekið Flothettunni fagnandi á 13. öld. En maske kunni hann þá tækni að fljóta sjálfur. Snilligáfa hans ber ýmis merki um það. Því sumir eru búnir þeim kostum að geta flotið án aðstoðar. Það eru þó býsna fáir. Þess vegna hafa orðið til sérstakir flottankar og allskyns útbúnaður. En ekkert í líkingu við íslensku Flothettuna sem veitir fólki algert frelsi til að fljóta inni sem úti. Þessi áhugi fólks á floti hefur líka orðið til þess að margir hafa rannsakað kosti flotsins. Og hér ýmsar magnaðar upplýsingar að finna um það

Og hér má líka sjá myndband um upplifun þess að fljóta á heimasíðu Float 

Líka djúp Zen hugleiðsla

Í stórskemmtilegri grein um Zen og flot sem birt var á The Week á síðasta ári fullyrðir greninarhöfundur að það að fljóta sé það næsta sem þú kemst vímu án þess að nota vímuefni. En mjög líklegt verður þó að telja að margt varðandi flot mannsins sé ennþá handan vísindanna . Í greininni segir líka af reynslu Zen meistara sem prófaði að fljóta í tanki á tilraunastofu. Einstaklingi sem hafði þá reynslu að hugleiða allt að fimm tíma á dag í mörg ár. Það er skemmst frá því að segja að reynsla hans af flotinu gerði hann agndofa. Dýpið sem hann fór á við það fljóta í klukkustund jafnaðist kannski á við það “bliss” sem varð hjá honum einu sinni á ári. Hér má lesa þá grein í heild sinni.

Margt magnað í farvatninu?

Það er mýmargt framundan sem snýr að flotinu. Það er sannarlega að snerta djúpt við mörgum sem hafa prófað. Þannig hefur Auður Bjarnadóttir, einn okkar reynslumesti og virtasti jógakennari, ákveðið að nota flotið sem hluta af sinni jógakennslu. Aqua Nidra (sbr Jóga nidra) er það sem hún hefur í huga. Það verður mjög áhugavert að fylgjast með því. Þá hafa margir íslenskir listamenn bitið á agnið og stefna að fljótandi upplifunar tónleikum á næstunni. Ferðamennskan er auðvitað líka að kveikja, hvað annað? Og margt er í bígerð sem snýr að skemmtilegum upplifunarferðum íslenskra og erlendra ferðamanna. Þar á Gamla laugin á Flúðum alveg örugglega eftir að spila mikilvæga rullu. Þá má alls ekki gleyma Breiðholtslauginni, sem líka orðið stendur fyrir mánaðarlegu Samfloti. Nú geta því þeir, sem vill sannarlega fljóta og njóta og slaka á og jafnvel hugleiða, bæði farið í Breiðholtslaug á miðvikudag og í Sundlaug Seltjarnarness næsta sunnudag kl. 9.00. Og hver veit nema allar sundlaugar landsins verði komnar með Samflot áður en varir?

FÆÐA/FOOD - fyrir matgæðinginn

Sérrit Í Boði náttúrunnar um mat og matarmenningu á íslensku og ensku. skoða nánar

Gjafaáskrift

Gefðu fallega og innihaldsríka gjöf Skoða nánar

Tögg úr greininni
, , ,
More from Systrasamlagið