Kínóa – stútfullt af næringu

Inkar kölluðu kínóa (e. quinoa) „móðurkornið“ og var það ein af grunnundirstöðum í fæði þeirra. Kínóa er stútfullt af næringu svo sem prótín, kalki, járni, sinki, B-vítamíni og líkaminn nýtir næringuna úr korninu einstaklega vel. Gott er að næla sér í prótín úr fjölbreyttum fæðutegundum og þá er kínóa tilvalið en það inniheldur 12-18% prótín og allar níu nauðsynlegu amínósýrurnar sem líkaminn þarfnast. Einnig er kínóa glúteinlaust og hentar því þeim sem eru með glúteinóþol. Hægt er að matreiða það á margan hátt, sem graut, í súpur, pottrétti og salat svo eitthvað sé nefnt. Mikilvægt er að skola kínóað vel til að hreinsa burt efni sem er kallast saponin og er utan á korninu og gerir það biturt á bragðið. Einnig er hægt að leggja kínóa í bleyti yfir nótt og verður það þá auðmeltara og næringarefnin nýtast enn betur. Hér fylgir mjög góð uppskrift af kínóa salati sem getur bæði verið heil máltíð eða hluti af máltíð:

GRÍSKT KÍNÓA SALAT

Griskt_quinoa_salat

1/2 bolli kínóa (ósoðið)
1 bolli vatn
10 stk kirsuberjatómatar
1/2 rauðlaukur, meðalstór
1 msk sítrónusafi
2 msk ólifuolía
1/2 tsk salt
1 bolli ferskt spínat
1-2 stk avókadó, meðalstórt
1/4 bolli fetaostur (valfrjálst)

Skolið kínóað vel og setjið í pott ásamt vatni. Eftir að suðan kemur upp er sett lok á pottinn og látið malla við vægan hita í um það bil 10 mínútur eða þar til allur vökvi er gufaður upp. Kínóað er þá sett í skál og látið kólna. Skerið niður rauðlauk, tómata, spínat og avókadó. Blandið þessu varlega saman við kínóað. Hrærið saman sítrónusafa, olíu og salti og helltið út á. Bætið fetaosti samanvið í lokin og skreytið með spínati!

Fallegt myndskeið sem sýnir í einföldum skrefum hvernig þú eldar kínóa:

Höf: Bryndís Ólafsdóttir

Gjafaáskrift

Gefðu fallega og innihaldsríka gjöf Skoða nánar

FÆÐA/FOOD - fyrir matgæðinginn

Sérrit Í Boði náttúrunnar um mat og matarmenningu á íslensku og ensku. skoða nánar

Tögg úr greininni
, ,