Reykjavík

LEIÐARVÍSIR UM MIÐBÆ REYKJAVÍKUR

GRÆNIR HANDVALDIR STAÐIR SEM STUÐLA AÐ BETRI UPPLIFUN, SJÁLFBÆRNI OG GLEÐI! 

277 km²
131.136 íbúar
36% landsmanna
borginokkar.is

MENNING OG AFÞREYING

1. FRÍSBÍGOLF Á KLAMBRATÚNI
Hér iðar allt af lífi þar sem níu brauta völlurinn liggur á milli hárra trjáa og víðáttumikilla grasflata. Völlurinn hentar bæði byrjendum og lengra komnum. Nú ef það fer að rigna þá má alltaf skella sér á Klambra bistro og fá sér léttar veitingar inni á Kjarvalstöðum.
Klambratúni, 105 Reykjavík

2. YLSTRÖNDIN NAUTHÓLSVÍK
Gulur skeljasandurinn minnir meira á strendurnar við Miðjarðarhafið en vík í nyrstu höfuðborg heims. Í Nauthólsvík er sturtuaðstaða, eimbað og heitur pottur þar sem sjósundsgarpar ylja sér að loknum sundspretti. Athugið opnunartíma áður en haldið er af stað.
Nauthólsvík
411 5330 | nautholsvik.is

3. SUNDHÖLLIN
Ein frægasta sundhöll landsins, hönnuð af Guðjóni Samúelssyni. Í dag skartar hún einnig nýrri útilaug, heitum og köldum potti ásamt nýju gufubaði. Stökkbrettin tvö slá öllum rennibrautum landsins við!
Barónsstíg 45a
411 5350 | reykjavik.is

4. ÁSMUNDARSALUR
Þetta fallega nýuppgerða og sjálfstæða listasafn beinir sjónum sérstaklega að innsetningum og list eftir unga listamenn. Ásmundur Sveinsson byggði þetta ótrúlega hús árið 1933, og bæði bjó í því og vann að höggmyndalist sinni. Á jarðhæð hússins er hægt að glugga í listaverkabækur og fá sér kaffi frá Reykjavík Roasters.
Freyjugötu 41
555 0041 | asmundarsalur.is

5. LISTASAFN EINARS JÓNSSONAR
Eitt af merkilegustu söfnum borgarinnar. Húsið var teiknað af Einari Jónssyni sjálfum og bjó hann þar með Önnu eiginkonu sinni. Hann gaf íslensku þjóðinni húsið og öll verkin á safninu. Höggmyndagarðurinn aftan við húsið er falinn paradís þar sem hægt er að njóta verka Einars í gróðursælum garðinum.
Hallgrímstorgi 3, 101 Reykjavík
551 3797 | lej.is

6. LISTASAFN ÍSLANDS
Listasafn Íslands er í einni af fallegri byggingum Reykjavíkurborgar og var byggt árið 1916, upphaflega sem íshús. Hér er boðið upp á gott yfirlit af listasögu Íslands frá 19. öld og til nútímans og eru oft spennandi sýningar frá bæði íslenskum sem og erlendum samtímalistamönnum. Metnaðarfull safnbúð býður upp á fallega list og hönnun.
Fríkirkjuvegi 7
515 9600 | listasafn.is

7. KOLAPORTIÐ
Ef maður vill hitta þverskurðinn af Íslendingum og finna dýrgripi á góðu verði, þá fer maður í Kolaportið. Elsti og eini alvöru markaðurinn í Reykjavík, sem bókstaflega iðar af lífi um helgar. Hér færðu einnig sjávarfang og vörur beint frá býli ásamt alls kyns fatnaði, bækur, skart, húsgögn og margt fleira.
Tryggvagötu 19
562 5030 | kolaportid.is

8. LISTASAFN REYKJAVÍKUR
Þrjú söfn heyra undir Listasafn Reykjavíkur – Hafnarhúsið, Kjarvalsstaðir og Ásmundarsafn. Söfnin bjóða öll upp á fjölbreyttar innlendar og alþjóðlegar myndlistarsýningar eftir virta listamenn auk þess að sýna reglulega verk eftir Erró, Kjarval og Ásmund Sveinsson. Ásmundarsafn verður lokað tímabundið vegna viðgerða. 
411 6400 | listasafnreykjavikur.is

9. LJÓSMYNDASAFN REYKJAVÍKUR
Staðsett á efstu hæðinni, fyrir ofan Borgarbókasafnið í Grófarhúsinu, þar sem fortíð og nútíð mætast. Vagga ljósmyndunar þar sem finna má sögulega og samtímaljósmyndun eftir íslenska ljósmyndara. Fjölbreyttar sýningar standa yfir allt árið.
Grófarhúsi, Tryggvagötu 15  
411 6390 | borgarsogusafn.is

10. LANDNÁMSSÝNINGIN
Þessi margverðlaunaða sýning í Aðalstrætinu var byggð í kringum rústir af langhúsi frá víkingaöld frá landnámsárinu 871 eða plús mínus 2. Víkingaöldin lifnar við í sýningu sem notast á frumlegan hátt við margmiðlunartækni, og höfðar til allra aldurshópa.
Aðalstræti 16
411 6370 | borgarsogusafn.is

11. HLJÓMSKÁLAGARÐURINN 
Fullkominn staður fyrir lautarferð, göngutúr, leik og jafnvel til að virða fyrir sér fuglalífið við Tjörnina. Góð og ódýr afþreying fyrir börn sem og fullorðna.
Við Sóleyjargötu

12. NORRÆNA HÚSIÐ
Þetta einstaka hús, sem var hannað af finnska arkitektinum Alvar Aalto, er sannkölluð menningarvin í borginni. Tónleikar, sýningar, fyrirlestrar, norrænt bókasafn, matur og lítil búð, sem selur norræna hönnun, eru meðal þess sem hægt er að njóta í þessu einstaka húsi ásamt öflugu barnastarfi. Sjá viðburði á vefsíðunni.
Sæmundargötu 11
551 7030 | nordichouse.is

13. ÞJÓÐMINJASAFNIÐ
Hér er farið í gegnum söguna og skoðaðir íslenskir fjársjóðir, allt frá landnámi og til nútímans. Viltu upplifa víkingaöld? Hér er hægt að skoða og koma við hluti í nútímalegri sýningu. Á jarðhæðinni er einstaklega falleg safnbúð og gott kaffihús, þar sem gott er að enda leiðangurinn á.
Suðurgötu 41
530 2200 | thjodminjasafn.is

14. SJÓMINJASAFNIÐ
Þessi verðlaunaða sýning er tileinkuð sjósögu Íslands. Hún spannar þorskastríðið, sjávarháska, sögu sjómennskunnar á landinu og margt fleira. Allir aldurshópar munu hafa gaman af sýningunni, og ekki síst þar sem býðst að skoða varðskipið Óðinn.
Grandagarði 8
411 6340 | borgarsogusafn.is

15. ÞÚFAN
Þúfan er ekki aðeins grasi vaxinn hóll, sem stendur við vestanverða Reykjavíkurhöfn, heldur umhverfislistaverk eftir listakonuna Ólöfu Nordal. Hægt er að ganga upp á toppinn og njóta útsýnisins yfir gamla bæinn, höfnina og út á sundin.
Norðurslóð, bak við HB Granda

MATUR OG DRYKKUR

16. HLEMMUR MATHÖLL
Fyrsta mathöll landsins, staðsett í fyrrum strætóstoppistöð á Hlemmi. Einn heitasti staðurinn í bænum fyrir matgæðinga þar sem finna má góðgæti frá ýmsum heimshornum, fá sér gott kaffi hjá Te og kaffi, snúð hjá Brauð & Co eða heimsklassa mat á Skál! eða Kröst og dreypa á góðu vínglasi með. Opnar kl. 7.30.
Laugavegi 107
787 6200 | hlemmurmatholl.is

17. SKÁL!
Gísli Matthías Auðunsson, yfirkokkur á Skál, býður upp á ævintýralega smárétti. Skál hlaut hina virtu Bib Gourmand viðurkenningu hjá Michelin 2019 en hún er veitt veitingastöðum um heim allan sem bjóða upp á hágæðamat á sanngjörnu verði. Á Skál færðu einnig gott úrval af náttúruvínum, bjór og frábæra kokteila.
Hlemmur Mathöll, Laugavegi 107
519 6515 | skalrvk.com

18. REYKJAVÍK ROASTERS
Þetta sívinsæla kaffihús flytur inn kaffibaunirnar sjálft og kaffið er borið fram af margverðlaunuðum kaffibarþjónum á þremur ólíkum staðsetningum. Kárastígurinn er kósí og gamaldags, Brautarholtið stærra og nútímalegra og nýjasti staðurinn í Ásmundarsal á Freyjugötu. Hér er alltaf hægt að treysta á að fá góðan bolla.
Kárastíg 1 – Brautarholti 2 – Freyjugötu 41
517 5535 | reykjavikroasters.is

19. SALT ELDHÚS – matreiðsluskóli
Salt býður upp á fjölbreytt og framandi matreiðslunámskeið, sem kjörið er fyrir vinahópinn að fara saman á og enda kvöldið svo á góðri máltíð. Pylsugerð, dumblings, súdeigsbakstur, ferskt pasta, franskar makkarónur, indverskir grænmetisréttir, mexíkóskur „streat food“ eða marakósk veisla eru meðal þess sem boðið er upp á.
Þórunnartúni 2
551 0171 | salteldhus.is

20. BRAUÐ & CO
Eflaust eitt mest myndaða bakarí í Reykjavík, en í þessu húsnæði opnaði Brauð & Co sitt fyrsta bakarí. Enn er boðið upp á lífrænt súrdeigsbrauð, geggjaða snúða og annað bakkelsi sem enginn má láta fram hjá sér fara á ferðalagi sínu um 101 Reykjavík.
Frakkastíg 16
456 7777 | braudogco.is

21. SUMAC
Sumac skartar tveimur af frægustu kokkum Íslands og býður upp á sannkallað ferðalag skilningarvita. Boðið er upp á dásamlegan mat þar sem ný norræn matargerð mætir matarhefðum og bragði frá Líbanon og Norður-Afríku. Grænkerar ættu líka að finna gott úrval af spennandi réttum. Staðurinn sjálfur er hrár og svalur með opið eldhús, kolagrilli og flottum bar, sem saman skapa lifandi andrúmsloft.
Laugavegi 28
537 9900 | sumac.is

22. VÍNSTÚKAN TÍU SOPAR 
Þar sem hið sögufræga kaffihús, Tíu dropar, var á Laugavegi, framreiða þeir Ragnar Eiríksson, Michelin-kokkur, og sjónvarpskokkurinn og sommelier-inn Ólafur Örn Ólafsson nú litla smárétti og bjóða upp á úrval gæðavína. Það verður enginn svikinn af halloumi, grilluðum padrones og hummus með nýbökuðu brauði ásamt vel völdu náttúruvíni. Svo er um að gera að skella sér í vínskólan og læra allt um vín.
Laugavegi 27
888 2380 | Facebook

23. VEÐURBARINN
Skemmtilegur lítill bar sem er frægur fyrir kokteila og klassíska drykki. Jólaglöggið þeirra var valið einn af bestu vetrardrykkjum heims af breska blaðinu The Guardian og bjóraðdáendur kvarta ekki því hér er ætið nóg úrval af áhugaverðum erlendum og innlendum bjórum. Drekkutími á milli 12-19.35 og fyrir kokteila milli 19-21.
Klapparstíg 33
571 5215 | Facebook

24. SYSTRASAMLAGIÐ
Lítið lífrænt kaffihús og verslun á Óðinsgötu, sem er rekið af tveimur jógaelskandi systrum. Þær bjóða upp á allt sem snertir hjarta, líkama og sál. Lífrænt kaffi, heilsudrykkir, samlokur, náttúrulegar umbúðir, lífrænn jógafatnaður og eiturefnalausar snyrtivörur eru meðal þess sem í boði er. Í góðu veðri er hægt að tilla sér út í bakgarðinn og njóta.
Óðinsgötu 1
511 6367 | systrasamlagid.is

25. MOKKA KAFFI
Þegar maður stígur inn um dyrnar á Mokka kaffi er eins og maður sé kominn aftur á sjöunda áratuginn. Mokka kaffi er elsta kaffihús Reykjavíkur og hefur boðið upp á gott kaffi allt frá árinu 1958 af sömu eigendum. Kaffihúsið á sér sérstakan stað í hjarta menningarvita borgarinnar. Hér færðu alvöru espresso og cappucino og dásamlegar belgískar vöfflur með rjóma.
Skólavörðustíg 3a
552 1174 | mokka.is

26. ÍSLENSKI BARINN
Heimilislegur og þjóðlegur matur með nútímalegu yfirbragði. Úrvalið af íslenskum réttum er hreint út sagt stórkostlegt: flatkökur, hákarl, lax og íslensk kjötsúpa, lambakjöt og réttir eins og plokkfiskur, matarmiklar pylsur og lambahamborgarar. Þeir bjóða stoltir upp á frábært úrval af íslenskum bjór og gini. Happy hour eða gleðistund er á milli 16-18.
Ingólfsstræti 1a
517 6767 | islenskibarinn.is

27. PETERSEN SVÍTAN
Það er auðvellt að ganga fram hjá inngangi Pedersen svítunnar og missa af honum, en það væri synd! Þetta þakrými var eitt sinn í eigu Peter Petersens, sem var bíóstjóri Gamla bíós. Þetta er án efa flottasti útsýnisbar borgarinnar með tveggja hæða útisvæði með hiturum og teppum til afnota. Reglulega er boðið upp á lifandi tónlist og plötusnúða. Drekkutími á milli 16-20.
Ingólfsstræti 2a, 3.hæð
563 4000 | gamlabio.is

28. LOFT HOSTEL – BAR
Þessi smekklegi alþjóðlegi bar á efstu hæð Loft Hostel í Bankastræti lætur ekki mikið yfir sér en er einn vinsælasti staður borgarinnar til að sitja úti á svölum og hitta góða vini yfir góðum bjór eða vínglasi. Það eru reglulega haldnir skemmtilegir pop up viðburðir á þessu svansvottaða hosteli. Drekkutími á milli 16-20.
Bankastræti 7, 4.hæð
553 8140 | lofthostel.is

29. SUSHI SOCIAL
Best þekkt fyrir fusion-matargerð þar sem íslensk hráefni mæta japönskum og suður-amerískum áhrifum. Boðið er upp á fjölda rétta en við mælum sérstaklega með Djúsí sushi sem er guðdómlegt. Prófið rúllu með reyktum lunda eða graflaxi og brennivíni og skyr í eftirrétt. Síðast en ekki síst er andrúmsloftið verulega svalt og kokteilarnir eru frábærir. 
Þingholtsstræti 5
568 6600 | sushisocial.is

30. APÓTEK KITCHEN + BAR
Apótek er staðsett, eins og nafnið gefur til kynna, í sögulegu húsnæði þar sem fyrsta apótek borgarinnar var en hýsir nú þennan fágaða og fallega veitingastað. Boðið er upp á hádegismat og kvöldverð þar sem áherslan er á íslensk hráefni eins og lunda, þorsk, hrefnu, sjóbleikju, lambakjöt og skyr. Framsetningin á réttunum og eftirtektarverðir kokteilar munu heilla þig upp úr skónum.
Austurstræti 16
551 0011 | apotekrestaurant.is

31. TE & KAFFI 
Í fjölda ára hefur áhugafólk um te og kaffi getað treyst á gæðinn hjá Te & kaffi. Kaffið er hægristað í smáum skömmtum, sem gefur kaffinu sinn einstaka keim. Kaffihúsið í Aðalstræti er lítið og sjarmerandi með gott útsýni yfir Fógetagarðinn. Sjálfbærni er eitt af leiðarljósum fyrirtækisins og bjóða þeir nú uppá smáforrit fyrir vildarvini sína.
Aðalstræti 9
527 2883 | teogkaffi.is

32 . FISKFÉLAGIÐ
Í fallega uppgerðum kjallara í hinu sögufræga Zimzen húsi, þar sem steinhleðslur, dempuð ljós og snarkandi eldur skapa einstakt andrúmsloft, má einnig finna matargerð sem svíkur engan. Lárus Gunnar Jónasson, kokkur, býður m.a. upp á bestu fiskrétti landsins ásamt hinni vinsælu Heimsreisu þar sem hann leikur sér með kryddjurtir framandi landa í bland við íslenskt gæðahráefni.
Vesturgötu 2a
552 5300 | fiskfelagid.is

33. BIO BORGARI 
Eini lífræni hamborgarastaðurinn á landinu þar sem allt hráefni kemur úr íslensku sveitinni og hamborgarabrauðið, sósurnar og rótar kartöfluflögurnar eru gerðar frá grunni á staðnum. Og að sjálfsögðu er veganborgari í boði. Innréttingarnar á þessum litla og fallega stað eru handsmíðaðar af bræðrunum sem eiga og reka staðinn.
Vesturgötu 12
519 5195 | bioborgari.com

34. FORRÉTTABARINN
Hér er hægt að gæða sér á bæði smáum sem stórum forréttum og eftirréttum úr íslensku hráefni með alþjóðlegu ívafi, s.s. heitreyktum lax með wasabi-jógúrti. Mælum með fjögurra rétta smakkmatseðlinum. Umhverfið er hrátt en smart og staðurinn, sem opnar klukkan 16.00, iðar af lífi.
Nýlendugötu 14
517 1800 | forrettabarinn.is

35. COOCOO’S NEST 
Þessi litli og kósí fjölskyldurekni staður kennir sig við slow-food matarstefnuna og býður upp á staðbundin hráefni með sjálfbærni að leiðarljósi. Hann er staðsettur úti á Granda í gömlum uppgerðum beitiskúr, boðið er upp á bröns um helgar, hádegisverð og kvöldverð. Einnig gera þau besta súrdeigsbrauðið í bænum, sem hægt er að taka með heim. 
Grandagarði 23
552 5454 | coocoosnest.is

36. LÚNA FLÓRENS
Þessi töfrandi sígaunabar og allskonar-búð er agnarsmá en heillar gesti upp úr skónum. Hver einasti litli hlutur á staðnum er til sölu allt frá blómum, reykelsi, kristöllum og kökum. Granatepla-mímósa, blómstrandi grænt te og framandi bjór eru meðal þess sem er á boðstólum. Drekkutími á milli 16-19 þar sem lystauki frá Coocos fylgir með.
Grandagarði 25
552 5454 | lunaflorens.is

37.  LA PRIMAVERA
La Primavera gekk í endurnýjun lífdaga á 25 ára afmælisdegi sínum í hinu nýuppgerða Marshall húsi úti á Granda, sem einnig hýsir nú þrjú listasöfn. Hér ríkir fágað andrúmsloft og gestir geta notið útsýnisins yfir sjóinn og yfir á Hörpu um leið og þeir njóta norður-ítalskrar matarhefðar úr íslensku gæðahráefni.
Grandagarði 20
519 7766 | laprimavera.is

HANDVERK OG HÖNNUN

38. GILBERT ÚRSMIÐUR
Stórstjörnur á borð við Tom Cruise og Yoko Ono eru meðal þeirra fjölmörgu frægra einstaklinga sem eiga úr eftir Gilbert úrsmið. Gilbert hannar undir nafninu JS watches en þau eru öll handgerð og framleidd á Íslandi úr bestu fáanlegu efnum og hugað að hverju einasta smáatriði. Verslunin er lítil perla fyrir áhugafólk um úr.
Laugavegi 62
551 4100 | jswatch.com

39. REYKJAVÍK RAINCOATS
Það rignir í meira en 200 daga á Íslandi og Reykjavík Raincoats búa til regnkápur sem standast tímans tönn. Handgerðar í gamaldags stíl í fjölmörgum litum, sem lífga upp á rigningardaga lífsins. Klassísk flík til að eiga í fataskápnum.
Laugavegi 62
571 1177 | reykjavikraincoats.com

40. FARMERS & FRIENDS
Eigendurnir Jóel og Bergþóra hafa sjálfbærni, notagildi og virðingu fyrir umhverfinu að leiðarljósi þegar þau hanna Farmers Market vörurnar, sem eru í senn klassískar og nútímalegar. Farmers & Friends verslanirnar eru tvær í Reykjavík og verður enginn svikinn af heimsókn þangað.
Hólmaslóð 2 & Laugavegi 37
552 1960 | farmersmarket.is

41. TULIPOP
Börn á öllum aldri elska litríku persónurnar í Tulipop-heiminum, sem var skapaður af hönnuðinum Signýju Kolbeinsdóttur. Í versluninni þeirra á Skólavörðustíg fást umhverfisvæn matarstell úr bambus, nestisbox án PBA, fallegar bækur og leikföng. 
Skólavörðustíg 43
519 6999 | tulipop.com

42. AGUSTAV
Parið og hönnuðirnir, Ágústa og Gústaf, vinna með við og hanna fallega handgerða hluti með norrænum aðferðum og sýna og selja í verslun sinni á Skólavörðustíg. Þau framleiða stóla, borð, hillur og spegla og nota svo afgangsvið í minni hluti eins og brauðbretti, mælistikur fyrir nýfædda og vinsælt bókahengi.
Skólavörðustíg 22
823 0013 | agustav.is

43. RAMMAGERÐIN
Ein af elstu gjafavöruverslunum landsins en um leið ein sú nútímalegasta. Þar er að finna vörur frá 470 íslenskum hönnuðum og handverksfólki. Hér færðu klassískar gjafir við öll tækifæri handa vinum vandamönnum. Veljum Íslenskt!
Skólavörðustíg 12
535 6694 | rammagerdin.is

44. RAUÐAKROSSBÚÐIN
Finndu einstaka flík á góðu verði og taktu þátt í endurvinnslu! Við þurfum að nýta fötin okkar betur, kaupa minna eða meira af vönduðum og/ eða notuðum flíkum. Rauðakrossbúðin á Skólavörðustíg býður upp handvalið úrval af vörum, sem gerir leitina að fallegri flík mun auðveldari. Hvort sem það er kjóll, lopapeysa, skór eða skart. 
Skólavörðustíg 12
544 4411 | raudikrossinn.is

45. HILDUR HAFSTEIN – SKART
Íslensk náttúra, öld vatnsberans, ítölsk áhrif og búddismi eru meðal þess sem veitir Hildi Hafstein innblástur og er uppskriftin að fallegum og litríkum skartgripum hennar. Hún notar náttúrulega steina, silfur og gull í hönnun sinni, sem nærir bæði hjarta og sál, auk þess að gleðja augað.
Klapparstíg 40
777 1553 | hildurhafstein.com

46. FISCHER
Fischer er einhvers staðar á milli þess að vera verslun, listagallerí eða listaverk! Vertu undirbúinn að gleðja skynfærinn og uppgötva náttúrulegar snyrtivörur, ilmvötn, keramík, skartgripi, tónlist og fleira. Allt sem er á boðstólum hér er valið eða framleitt af systkinunum Ingu, Jónsa í Sigurrós og Lilju Birgisbörnum.
Fischersundi 3
692 0032 | fischersund.com

47. KOGGA KERAMIK GALLERÍ
Kogga er einn virtasti keramíklistamaður landsins og sannkallaður frumkvöðull á því sviði. Stúdíóið hennar hefur verið hluti af sögu Reykjavíkur í þrjátíu ár þar sem hún býr til tímalausa hluti með sinni einstöku aðferð. Hvort sem um er að ræða kaffibolla, skál, eða egg, þá eru þetta klassískir og tímalausir hlutir sem verða dýrmætari með árunum.
Vesturgötu 5
552 6036 | kogga.is

48. AS WE GROW
Hugmyndafræði þessa íslenska fatamerkis er að hanna fallegar og vandaðar flíkur sem endast og geta gengið á milli barna eða jafnvel kynslóða. As we grow hefur fengið gullverðlaun sem besta vistvæna fatamerkið fyrir börn enn  fullorðnir geta einnig fagnað því nú er hægt að kaupa húfur, peysur, slár og fleira á okkur, stóru börnin.
Garðastræti 2
519 3100 | aswegrow.is

Tögg úr greininni