Rómantík á Snæfellsnesi

TEXTI Guðbjörg Gissurardóttir MYNDIR Guðbjörg Gissurardóttir

Fyrir hrun var planið að gifta sig á Ítalíu, umkringd mínum nánustu í rómantískri sveit með drekkhlaðið ítalskt hlaðborð og ódýr en góð rauðvín. Sá draumur hrundi með bönkunum. Það liðu heil tíu ár þar til gifting barst aftur í tal, sem við létum verða af í látlausri en yndislegri athöfn úti í garði með börnum og foreldrum. Héldum síðan partí fyrir vini og ættingja og í framhaldinu ætluðum við að skipuleggja ógleymanlega brúðkaupsferð á framandi slóðir. 

Látravík

Brúðkaupsferð á Runólfi

En svo leið og beið og aldrei kom rétta augnablikið fyrr en sumarið 2020! Þá voru rúm tuttugu ár liðin síðan ég og nýbakaður eiginmaður minn höfðum ferðast ein um Ísland, eða fyrir barneignir. Við ákváðum því að plana ógleymanlega ferð á Runólfi Rauða, húsbílnum okkar, sem gerir öll ferðalög að meira ævintýri og njóta þess að vera í fámenninu á Íslandi eins og hér áður fyrr. Snæfellsnes varð fyrir valinu, enda eitt af mínum uppáhaldssvæðum á landinu. Þó svo að við hefðum ekki skipulagt ferðina í þaula, þá settum við niður nokkur atriði á blað, sem við fórum eftir til að tryggja að við kæmum alsæl heim og aðeins skotnari hvort í öðru.

Við ákváðum því að plana ógleymanlega ferð á Runólfi Rauða, húsbílnum okkar, sem gerir öll ferðalög að meira ævintýri og njóta þess að vera í fámenninu á Íslandi eins og hér áður fyrr.

Látravík

Tíu hugmyndir að farsælli brúðkaupsferð eftir 23 ára sambúð!

1. Fara á 40 ára gömlum húsbíl, sem getur bilað hvenær sem er og skapar þannig óvissu og spennu, sem gerir ferðina að enn meira ævintýri.

2. Deila einni sæng eins og maður gerði hér áður fyrr.

3. Gera samkomulag um að tala ekki um börnin og upplifa fullkomið ábyrgðarleysi.

4. Taka eina ,,kossasjálfu“ á hverjum degi.

5. Velja næturstað með fallegu útsýni og helst sem lengst frá öðrum ferðalöngum.

Veiði við Hítarvatn
Arnarstapi

6. Gera vel við sig í mat og drykk og njóta þess að tala saman án truflunar.

7. Bjóða hvort öðru fínt út að borða og splæsa í gott kaffi og meðlæti þar sem það býðst.

8. Koma hvort öðru á óvart með góðri gjöf úr krúttlegri verslun á svæðinu.

9. Gera eitthvað skemmtilegt saman á hverjum degi, t.d. fara á hestbak, veiða, í sund og fara á söfn og sýningar.

10. Segja nógu oft ,,Ég elska þig“ þrátt fyrir að það virki ýkt til að byrja með.

Látravík

Þetta virkaði fyrir okkur! Við vorum a.m.k. mun skotnari hvort í öðru í lok brúðkaupsferðarinnar.

Sjá einnig grein Fimm leiðir að vellíðan

Þessi grein er úr sumarblaði Lifum Betur – í boði náttúrunnar 2021

Tögg úr greininni
, ,